Caturthaṃ kośasthānam
Technical Details
caturthaṃ kośasthānam
oṃ namo buddhāya|
karmajaṃ lokavaicitryaṃ cetanā tatkṛtaṃ ca tat|
cetanā mānasaṃ karma tajjaṃ vākkāyakarmaṇī||1||
te tu vijñaptyavijñaptī kāyavijñaptiriṣyate|
saṃsthānaṃ na gatiryasmātsaṃskṛtaṃ kṣaṇikaṃ vyayāt||2||
na kasyacidahetoḥ syāt hetuḥ syācca vināśakaḥ|
dvigrāhyaṃ syāt na cāṇau tat vāgvijñaptistu vāgdhvaniḥ||3||
trividhāmalarūpoktivṛddhayakurvatpathādibhiḥ|
kṣaṇādūrdhvamavijñaptiḥ kāmāptātītabhūtajā||4||
svāni bhūtānyupādāya kāyavākkarma sāsravam|
anāsravaṃ yatra jātaḥ avijñaptiranupāttikā||5||
naiḥṣyandikī ca sattvākhyā niṣyandopāttabhūtajā|
samādhijau pacayikānupāttābhinnabhūtajā||6||
nāvyākṛtāstyavijñaptiḥ tridhā'nvyat aśubhaṃ punaḥ|
kāme rūpe'pyavijñaptiḥ vijñaptiḥ savicārayoḥ||7||
kāme'pi nivṛtā nāsti samutthānamasadyataḥ|
paramārthaśubho mokṣaḥ svato mūlahyrapatrapāḥ||8||
saṃprayogeṇa tadyuktāḥ samutthā nāt kriyādayaḥ|
viparyayeṇākuśalaṃ paramāvyākṛte dhruve||9||
samutthānaṃ dvidhā hetutatkṣaṇotthānasaṃjñitam|
pravartakaṃ tayorādyaṃ dvitīyamanuvartakam||10||
pravartakaṃ dṛṣṭiheyaṃ vijñānam ubhayaṃ punaḥ|
mānasaṃ bhāvanāheyaṃ pañcakaṃ tvanuvartakam||11||
pravartake śubhādau hi syāttridhā'pyanuvartakam|
tulyaṃ muneḥ śubhaṃ yāvat nobhayaṃ tu vipākajam||12||
avijñaptistridhā jñeyā saṃvarāsaṃvaretarā|
saṃvaraḥ prātimokṣākhyo dhyānajo'nāsravastathā||13||
aṣṭadhā prātimokṣākhyaḥ dravyatastu caturvidhaḥ|
liṅgato nāmasaṃcārāt pṛthak te cāvirodhinaḥ||14||
pañcāṣṭadaśasarvebhyo varjyebhyo viratigrahāt|
upāsakopavāsasthaśramaṇoddeśabhikṣutā||15||
śīlaṃ sucaritaṃ karma saṃvaraścocyate punaḥ|
ādye vijñaptyavijñapto prātimokṣakriyāpathaḥ||16||
prātimokṣānvitā aṣṭau dhyānajena tadanvitaḥ|
anāsraveṇāryasattvāḥ antyau cittānuvartinau||17||
anāgamye prahāṇākhyau tāvānantaryamārgajau|
saṃprajñānasmṛtī dve tu manaindriyasaṃvarau||18||
prātimokṣasthito nityamatyāgā dvartamānayā|
avijñaptyā'nvitaḥ pūrvāt kṣaṇādūrdhvamatītayā||19||
tathaivāsaṃvarastho'pi dhyānasaṃvaravān sadā|
atītājātayā āryastu prathame nābhyatītayā||20||
samāhītāryamārgasthau tau yuktau vartamānayā|
madhyasthasyāsti cedādau madhyayā ūrdhvaṃ dvikālayā||21||
asaṃvarasthaḥ śubhayā'śubhayā saṃvare sthitaḥ|
avijñaptyānvito yāvat prasādakleśavegavān||22||
vijñaptyā tu punaḥ sarve kurvanto madhyayānvitāḥ|
atītayā kṣaṇādūrdhvamātyāgāt nāstyajātayā||23||
nivṛtānivṛtābhyāṃ ca nātītābhyāṃ samanvitaḥ|
asaṃvaro duścaritaṃ dauḥśīlyaṃ karma tatpathaḥ||24||
vijñaptyaivānvitaḥ kurvanmadhyastho mṛducetanaḥ|
tyaktānutpannavijñaptiravijñaptyāryapudgalaḥ||25||
dhyānajo dhyānabhūmyaiva labhyate anāsravastayā|
āryayā prātimokṣākhyaḥ paravijñapanādibhiḥ||26||
yāvajjīvaṃ samādānamahorātraṃ ca saṃvṛteḥ|
nāsaṃvaro'styahorātraṃ na kilaivaṃ pragṛhyate||27||
kālyaṃ grāhyo'nyato nīcaiḥ sthitenoktānuvāditā|
upavāsaḥ samagrāṅgo nirbhūṣeṇāniśākṣayāt||28||
śīlāṅgānyapramādāṅgaṃ vratāṅgāni yathākramam|
catvāryekaṃ tathā trīṇi smṛtināśo madaśca taiḥ||29||
anyasyāpyupavāso'sti śaraṇaṃ tvagatasya na|
upāsakatvopagamātsaṃvṛt uktistu bhikṣuvat||30||
sarve cet saṃvṛtā ekadeśakāryādayaḥ katham|
tatpalanāt kila proktāḥ mṛdvāditvaṃ yathā manaḥ||31||
buddhasaṃghakarāndharmānaśaikṣānubhayāṃśca saḥ|
nirvāṇaṃ ceti śaraṇaṃ yo yāti śaraṇatrayam||32||
mithyācārātigarhyatvātsaukaryādākriyāptitaḥ|
yathābhyupagamaṃ lābhaḥ saṃvarasya na saṃtate||33||
mṛṣāvādaprasaṅgācca sarvaśikṣāvyatikrame|
pratikṣepaṇasāvadyānmadyādeva anyuguptaye||34||
sarvobhayebhyaḥ kāmāpto vartamānebhya āpyate|
maulebhyaḥ sarvakālebhyo dhyānānāsrava saṃvarau||35||
saṃvaraḥ sarvasattvebhyo vibhāṣā tvaṅgakāraṇaiḥ|
asaṃvarastu sarvebhyaḥ sarvāṅgebhyo na kāraṇaiḥ||36||
asaṃvarasya kriyayā lābho'bhyupagamena vā|
śeṣāvijñaptilābhastu kṣetrādānādarehanāt||37||
prātimokṣadamatyāgaḥ śikṣānikṣepaṇāccyuteḥ|
ubhayavyañjanotpattermūlacchedānniśātyayāt||38||
patanīyena cetyeke saddharmāntadhito'pare|
dhanarṇavattu kāśmīrairāpannasyeṣyate dvayam||39||
bhūmisaṃcārahānibhyāṃ dhyānāptaṃ tyajyate śubham|
tathārūpyāptamāryaṃ tu phalāptyuttaptihānibhiḥ||40||
asaṃvaraḥ saṃvarāptimṛtyudvivyañjanodayaiḥ|
vegādānakriyārthāyurmūlacchedaistu madhyamā||41||
kāmāptaṃ kuśalārūpaṃ mūlacchedordhvajanmataḥ|
pratipakṣodayāt kliṣṭamarūpaṃ tu vihīyate||42||
nṛṇāmasaṃvaro hitvā śaṇḍha paṇḍadvidhākṛtīn|
kurūṃśca saṃvaro'pyevaṃ devānāṃ ca nṛṇāṃ trayaḥ||43||
kāmarūpajadevānāṃ dhyānajaḥ anāsravaḥ punaḥ|
dhyānāntarāsaṃjñisattvavarjyānāmapyarūpiṇām||44||
kṣemākṣemetaratkarma kuśalākuśaletarat|
puṇyāpuṇyamaniñjaṃ ca sukhevedyādi ca trayam||45||
kāmadhātau śubhaṃ karma puṇyamāneñjamūrdhvajam|
tadbhūmiṣu yataḥ karmavipākaṃ prati neñjati||46||
sukhavedyaṃ śubhaṃ dhyānādātṛtīyāt ataḥ param|
aduḥkhāsukhavedyaṃ tu duḥkhavedyamihāśubham||47||
adho'pi madhyamastyeke dhyānāntaravipākataḥ|
apūrvācaramaḥ pākastrayāṇāṃ ceṣyate yataḥ||48||
svabhāvasaṃprayogābhyāmālambanavipākataḥ|
saṃmukhībhāvataśceti pañcadhā vedanīyatā||49||
niyatāniyataṃ tacca niyataṃ trividhaṃ punaḥ|
dṛṣṭadharmādivedyatvāt pañcadhā karma kecana||50||
catuṣkoṭikamityanye nikāyākṣepaṇaṃ tribhiḥ|
sarvatra caturākṣepaḥ śubhasya narake tridhā||51||
yadviraktaḥ sthiro bālastatra notpadyavedyakṛt|
nānyavedyakṛdapyāryaḥ kāme'gre vā'sthiro'pi na||52||
dvāviṃśatividhaṃ kāmeṣvākṣipatyantarābhavaḥ|
dṛṣṭadharmaphalaṃ tacca nikāyo hyeka eva saḥ||53||
tīvrakleśaprasādena sātatyena ca yatkṛtam|
guṇakṣetre ca niyataṃ tatpitrorghātakaṃ ca yat||54||
dṛṣṭadharmaphalaṃ karma kṣetrāśayaviśeṣataḥ|
tadbhūmyatyantavairāgyāt vipāke niyataṃ hi yat||55||
ye nirodhāraṇāmaitrīdarśanārhatphalotthitāḥ|
teṣu kārāpakārāsya phalaṃ sadyo'nubhūyate||56||
kuśalasyāvitarkasya karmaṇo vedanā matā|
vipākaścaitasikyeva kāyikyevāśubhasya tu||57||
cittakṣepo manaścitte sa ca karmavipākajaḥ|
bhayopaghātavaiṣamyaśokaiśca akurukāminām||58||
vaṅkadoṣakaṣāyoktiḥ śāṭhyadveṣajarāgaje|
kṛṣṇaśuklādibhedena punaḥ karma caturvidham||59||
aśubhaṃ rūpakāmāptaṃ śubhaṃ caiva yathākramam|
kṛṣṇaśuklobhayaṃ karma tatkṣayāya nirāsravam||60||
dharmakṣāntiṣu vairāgye cānantaryapathāṣṭake|
yā cetanā dvādaśadhā karma kṛṣṇakṣayāya tat||61||
navame cetanā yā sā kṛṣṇaśuklakṣayāya ca|
śuklasya dhyānavairāgyeṣvantyānantaryamārgajā||62||
anye narakavedyānyakāmavedyaṃ dvayaṃ viduḥ|
dṛgdheyaṃ kṛṣṇamanye anyatkṛṣṇaśuklaṃ tu kāmajam||63||
aśaikṣaṃ kāyavākkarma manaścaiva yathākramam|
maunatrayam tridhā śaucaṃ sarva sucaritatrayam||64||
aśubhaṃ kāyakarmādi mataṃ duścarita trayam|
akarmāpi tvabhidhyādimanoduścaritaṃ tridhā||65||
viparyayātsucaritam tadaudārikasaṃgrahāt|
daśa karmapathā uktā yathāyogaṃ śubhāśubhāḥ||66||
aśubhāḥ ṣaḍavijñaptiḥ dvidhaikaḥ te'pi kurvataḥ|
dvividhāḥ sapta kuśalāḥ avijñaptiḥ samādhijāḥ||67||
sāmantakāstu vijñaptiḥ avijñaptirbhavenna vā|
viparyayeṇa pṛṣṭhāni prayogastu trimūlajaḥ||68||
tadanantarasaṃbhūterabhidhyādyāstrimūlajāḥ|
kuśalāḥ saprayogāntā alobhadveṣamohajāḥ||69||
vadhavyāpādapāruṣyaniṣṭhā dveṣeṇa lobhataḥ|
parastrīgamanābhidhyā'dattādānasamāpanam||70||
mithyādṛṣṭestu mohena śeṣāṇāṃ tribhiriṣyate|
sattvabhogāvadhiṣṭhānaṃ nāmarūpaṃ ca nāma ca||71||
samaṃ prāk ca mṛtasyāsti na maulaḥ anyāśrayodayāt|
senādiṣvekakāryatvāt sarve karttṛvadanvitāḥ||72||
prāṇātipātaḥ saṃcintya parasyābhrāntimāraṇam|
adattādānamanyasvasvīkriyā balacauryataḥ||73||
agamyagamanaṃ kāmamithyācāraścaturvidhaḥ|
anyathāsaṃjñino vākyamarthābhijñe mṛṣāvacaḥ||74||
cakṣuḥ śrotamanaścittairanubhūtaṃ tribhiśca yat|
taddaṣṭaśrutavijñātaṃ mataṃ coktaṃ yathākramam||75||
paiśunyaṃ kliṣṭacittasya vacanaṃ parabhedane|
pārūṣyamapriyaṃ sarva kliṣṭaṃ bhinna pralāpitā||76||
ato'nyat kliṣṭamityanye lapanāgītanāṭyavat|
kuśāstavacca abhidhyā tu parasvaviṣamaspṛhā||77||
vyāpādaḥ sattvavidveṣaḥ nāstidṛṣṭiḥ śubhāśubhe|
mithyādṛṣṭiḥ trayo hyatra panthānaḥ sapta karma ca ||78||
mūlacchedastvasaddṛṣṭayā kāmāptotpattilābhinām|
phalahetvapavādinyā sarvathā kramaśaḥ nṛṣu||79||
chinatti strī pumān dṛṣṭicaritaḥ so'samanvayaḥ|
saṃdhiḥ kāṅkṣāstidṛṣṭibhyāṃ nehānantaryakāriṇaḥ||80||
yugapadyāvadaṣṭābhiraśubhaiḥ saha vartate|
cetanā daśabhiryāvacchubhaiḥ naikāṣṭapañcabhiḥ||81||
bhinnapralāpapārūṣyavyāpādā narake dvidhā|
samanvāgamato'bhidhyāmithyādṛṣṭī kurau trayaḥ||82||
saptamaḥ svayamapyatra kāme'nyatra daśāśubhāḥ|
śubhāstrayastu sarvatra saṃmukhībhāvalābhataḥ||83||
ārūpyāsaṃjñisattveṣu lābhataḥ sapta śeṣite|
saṃmukhībhāvataścāpi hitvā sanarakān kurūn||84||
sarve'dhipatiniṣyandavipākaphaladā matāḥ|
duḥkhanānmāraṇādojonāśanāttrividhaṃ phalam||85||
lobhajaṃ kāyavākkarma mithyājīvaḥ pṛthak kṛtaḥ|
duḥśodhatvāt pariṣkāralobhotthaṃ cet na sūtrataḥ||86||
prahāṇamārge samale saphalaṃ karma pañcabhiḥ|
caturbhiramale anyacca sāsravaṃ yacchubhāśubham||87||
anāsravaṃ punaḥ śeṣaṃ tribhiravyākṛtaṃ ca yat|
catvāri dve tathā trīṇi kuśalasya śubhādayaḥ||88||
aśubhasya śubhādyā dve trīṇi catvāryanukramam|
avyākṛtasya dve trīṇi trīṇī caite śubhādayaḥ||89||
sarve'tītasya catvāri madhyamasyāpyanāgatāḥ|
madhyamā dve ajātasya phalāni trīṇyanāgatāḥ||90||
svabhūmidharmāścatvāri trīṇi dve vā'nyabhūmikāḥ|
śaikṣasya trīṇi śaikṣādyāḥ aśaikṣasya tu karmaṇaḥ||91||
dharmāḥ śaikṣādikā ekaṃ phalaṃ trīṇyapi ca dvayam|
tābhyāmanyasya śaikṣādyā dve dve pañca phalāni ca||92||
trīṇi catvāri caikaṃ ca dṛggheyasya tadādayaḥ|
te dve catvāryatha trīṇi bhāvanāheyakarmaṇaḥ||93||
apraheyasya te tvekaṃ dve catvāri yathākramam|
ayogavihitaṃ kliṣṭaṃ vidhibhraṣṭaṃ ca kecana||94||
ekaṃ janmākṣipatyekam anekaṃ paripūrakam|
nākṣepike samāpattī acitte prāptayo na ca||95||
ānantaryāṇi karmāṇi tīvrakleśo'tha durgatiḥ|
kauravāsaṃjñittvāśca matamāvaraṇatrayam||96||
triṣu dvipeṣvānantarya śaṇḍhā dīnāṃ tu neṣyate|
alpopakārālajjitvāt śeṣe gatiṣu pañcasu||97||
saṃghabhedastvasāmagrīsvabhāvo viprayuktakaḥ|
akliṣṭāvyākṛto dharmaḥ saṃghastena samanvitaḥ||98||
tadavadya mṛṣāvādastena bhettā samanvitaḥ|
avīcau pacyate kalpam adhikairadhikā rujaḥ||99||
bhikṣurdṛk carito vṛttī bhinatti anyatra bāliśān|
śāstṛmārgāntarakṣāntau bhinnaḥ na vivasatyasau||100||
cakrabhedaḥ sa ca mataḥ jambūdvīpe navādibhiḥ|
karmabhedastriṣu dvipeṣu aṣṭabhiradhikaiśca saḥ||101||
ādāvante'rbudāt pūrvaṃ yugāccoparate munau|
sīmāyāṃ cāpyabaddhāyāṃ cakrabhedo na jāyate||102||
upakāriguṇakṣetranirākṛtivipādanāt|
vyañjanāntarito'pi syāt mātā yacchoṇitobhdavaḥ||103||
buddhe na tāḍanecchasya prahārānnordhvamarhati|
nānantaryaprayuktasya vairāgyaphalasaṃbhavaḥ||104||
saṃghabhede mṛṣāvādo mahāvadyatamo mataḥ|
bhavāgracetanā loke mahāphalatamā śubhe||105||
dūṣaṇaṃ māturarhantyā niyatisthasya māraṇam|
bodhisattvasya śaikṣasya saṃghāyadvārahārikā||106||
ānantaryasabhāgāni pañcamaṃ stūpabhedanam|
kṣāntyanāgāmitārhattvaprāptau karmātivighnakṛt||107||
bodhisattvaḥ kuto yāvat yato lakṣaṇa karmakṛt|
sugatiḥ kulajo'vyakṣaḥ pumān jātismaro'nivṛt||108||
jambūdvīpe pumāneva saṃmukhaṃ buddhacetanaḥ|
cintāmayaṃ kalpaśate śeṣa ākṣipate hi tat||109||
ekaikaṃ puṇyaśatajam asaṃkhyeyatrayāntyajāḥ|
vipaśyī dīpakṛdatnaśikhī śākyamuniḥ purā||110||
sarvatra sarva dadataḥ kārūṇyāddānapūraṇam|
aṅgacchede'pyakopāttu rāgiṇaḥ kṣāntiśīlayoḥ||111||
tiṣyastotreṇa vīryasya dhīsamādhyoranantaram|
puṇyaṃ kriyā'tha tadvastu trayaṃ karmapathā yathā||112||
dīyate yena taddānaṃ pūjānugrahakāmyayā|
kāyavākkarma sotthānaṃ mahābhogyaphalaṃ ca tat||113||
svaparārthobhayārthāya nobhayārthāya dīyate|
tadviśeṣaḥ punardātṛvastukṣetraviśeṣataḥ||114||
dātā viśiṣṭaḥ śraddhādyaiḥ satkṛtyādi dadāti ataḥ|
satkārodārarucitā kālānācchedyalābhitā||115||
varṇādisampadā vastu surūpatvaṃ yaśasvi vā|
priyatā sukumārartusukhasparśāṅgatā tataḥ||116||
gatiduḥkhopakāritvaguṇaiḥ kṣetraṃ viśiṣyate|
agraṃ muktasya muktāya bodhisattvasya ca aṣṭamam||117||
mātṛpitṛglānadhārmakathikebhyo'ntyajanmane|
bodhisattvāya cāmeyā anāryebhyo'pi dakṣiṇā||118||
pṛṣṭhaṃ kṣetramadhiṣṭhānaṃ prayogaścetanāśayaḥ|
eṣāṃ mṛdvadhimātratvāt karmamṛdvadhimātratā||119||
saṃcetanasamāptibhyāṃ niṣkraukṛtya vipakṣataḥ|
parivārādvipākācca karmopacittamucyate||120||
caitye tyāgānvayaṃ puṇyaṃ maitryādivadagṛṇhati|
kukṣetre'pīṣṭaphalatā phalabījāviparyayāt||121||
dauḥśīlyamaśubhaṃ rūpaṃ śīlaṃ tadviratiḥ dvidhā|
pratikṣiptācca buddhena viśuddhaṃ tu caturguṇam||122||
dauḥśīlyataddhetvahataṃ tadvipakṣaśamāśritam|
samāhitaṃ tu kuśalaṃ bhāvanā cittavāsanāt||123||
svargāya śīlaṃ prādhānyāt visaṃyogāya bhāvanā|
caturṇāṃ brāhmapuṇyatvaṃ kalpaṃ svargeṣu modanāt||124||
dharmadānaṃ yathābhūta sūtrādyakliṣṭadeśanā|
puṇyanirvāṇanirvedhabhāgīyaṃ kuśalaṃ tridhā||125||
yogapravartitaṃ karma sasamutthāpakaṃ tridhā|
lipimudre sagaṇanaṃ kāvyaṃ saṃkhyā yathākramam||126||
sāvadyā nivṛtā hīnāḥ kliṣṭāḥ dharmāḥ śubhāmalāḥ|
praṇītāḥ saṃskṛtaśubhā sevyāḥ mokṣastvanuttaraḥ||127||
abhidharmakośe karmanirddeśo nāma
caturtha kośasthānamiti||